職場初哥注意　辦公室招魂大法

好喇，恭喜你終於千辛萬苦，過五關斬六將搵到份新工，仲懷住一份熾熱嘅心，唔介意由底做起，打算成就一翻事業。

可惜，過一段時間就會發現，每日都有冗長繁瑣嘅工作、上司或腦細堅離地嘅指令、無理取鬧嘅西客等住你。正所謂再鋒利嘅刀都會有生銹嘅一日，何況係身為一個初出茅廬嘅職場新鮮人，所擁有嘅薄弱意志？究竟點先可以 Keep 心中嗰團火？﹝或者最少唔好蛻變為一個冇靈魂嘅肉體？﹞

得閒行行企企

唔係講笑，因為一坐落張凳開始做嘢，個人就會跌 Watt 係眾所周知嘅事，所以係生活中有適量嘅運動係可以提升工作效率，當然晨跑、游早水、踩單車返工呢啲聽落早起健康到爆嘅活動唔係人人做到，但起碼做嘢做到咁上下行下企下拉下筋之後，收工返屋企嘅時間啲筋骨都冇咁攰。

搵個知心好友

雖然你唔係叮噹裡面個技安，但都最好係公司搵個好知己。俗語話「人生不如意事十常八九」，公司有個朋友，遇到唔開心嘅事就可以互相分擔下，食飯又可以多隻腳，加上有人嘅地方就有政治，雖然你有事佢唔一定可以兩肋插刀，但最少平時都可以多個人幫手收風。

時間管理

有調查發現打工仔返工時通常係「扮工」多於「辦工」，工作時間縮短嘅情況底下要照樣完成當日嘅 Tasks，效率就顯得非常重要，而時間管理就係改善效率嘅方法。坊間有好多唔同種類嘅時間管理法畀大家參考，好似番茄工作法，教你每次工作 25 分鐘，之後休息 5 分鐘；四象限法就叫你先完成重要但唔緊急嘅事，再做緊急但唔重要嘅事等等。

帶飯

好多人帶飯嘅首要目的係慳錢，的而且確係可以慳到，但其實仲有其他好處。首先，話哂都叫自家製，冇出面咁多油鹽糖，點都健康啲；其次可以幫你清咗雪櫃啲隔夜飯；最重要係，可以畀機會你同帶飯嘅同事聯誼，吹下水講下是非。

當然，如果你公司環境唔方便食飯、腦細 Lunch Time 長駐或者你個圈子鍾意出去食又另當別論。

唔好啤行哂

唔係叫你唔好啤人哋﹝咁當然都唔好啦﹞，而係叫你唔好啤行隻 Mon。眼睛係靈魂之窗，除咗可以用黎同心儀同事眉目傳情之外，仲要靠佢哋睇嘢﹝廢話！﹞，如果佢哋唔舒服，咁你呢一日都唔駛旨意好過。每望 Mon 望夠 20 – 30 分鐘，就要望下遠嘢，俾對眼休息一下。

預早入倉

唔駛驚！唔係導你買基金，係叫你買定啲咖啡零食啫，等自己可以係跌 Watt、心情唔好、小休、無所事事嘅時候叉下電。由於黐飲黐食嘅人多如恆河沙數，若果唔想分甘同味，就要好好保護自己嘅糧倉喇！

成就紀錄

某程度上返工同打機差唔多，當你完成一定數量嘅任務，達到某啲成就就可以升級。開個 Folder 紀錄低你達成咗啲咩，可以俾你係心灰意冷嘅時候睇返原來做咗咁多嘢，等你可以自我感覺良好，重拾返一部份衝勁；當重要嘅 Appraisal 來臨，仲可以作為 Reference 俾腦細睇，提醒佢又係時候加人工喇！