提升效率　拒絕費時會議

當手頭上有好多工作，腦細不單止冇體諒，反而不斷催促進度或者歸咎自己，試問係咁嘅工作環境底下點會唔令人氣餒？其實有時並唔係唔想將工作做好，而係每日都會被大量無用嘅會議佔據時間，打斷工作日程，嚴重影響效率。

有外國調查發現有百分之四十六的受訪者幾乎願意做任何嘢換嚟唔駛開會，更加有百分之十七嘅人寧願望住牆上嘅油漆變乾都唔想開會！究竟有咩辦法可以應付呢啲無用而浪費時間嘅會議？

取消

最簡報、直接、有效嘅方法。（大家唔好笑，我係真心嘅）

問清楚自己係咪真係需要開個會，如果冇開到，會有咩後果；假若答案係冇，或者根本唔嚴重，就可以考慮下取消個會佢，皆大歡喜。

定期匯報

就算係不同行業，開會嘅某啲內容都係大同小異，例如要同事匯報大家嘅工作進度。倘若人數唔多，可以電郵、電話、通信軟件解決，相反就可以嘗試利用網上共享文件更新進度。

網上會議

就算真係需要開會，都仲有好多折衷方法，其中一種就係網上會議。電腦科技嘅進步令我就算係咩時間咩地方都可以同其他人保持連繫，利用電子設備進行網上會議對好多公司嚟講都唔係難事，只要有部電腦有網絡就可以開到會。

午餐會議

再退一步，若果真係要同對方面對面傾，都可以選擇以一個較輕鬆嘅方式嚟進行。當然唔係任何會議都可以用午餐會取代，但當討論嘅內容唔係太嚴肅嘅時候，不妨試下咁做。

站立會議

到最後避免唔到真係要係會議室開個會，但又唔想冗長而冇效率，可以考慮進行一個站立會議。根據統計，呢個新穎嘅開會方式可以令會議時間縮短百分之三十四，因為站立嘅不舒適感會令開會嘅人長話短說，分享時會更著重於「有效」嘅意見。