寓工作於娛樂 10 個好 Paid 嘅有趣工種
如果你有一日發覺自己死 Chur 住張被唔肯起身返工，做嘢又冇哂動力，隻腳明明搭入咗公司門口但個靈魂又唔識跟住嚟嘅時候，你會點做？積極面對改善工作效率？定還是心生退意考慮轉工？如果係後者，又點樣可以確保唔再陷入呢種會令人心灰意冷嘅惡性循環？
外國有個教育機構就選咗 32 個有趣嘅職位，再羅列出當中十大高人工嘅工種，睇下有冇一份啱你心水！
十、品酒師
品酒師評酒時當然唔可以俾酒精影響專業，所以係試酒會度都會將試完嘅酒吐出。
平均月薪約 HKD30,000
除咗可以品嚐世界各地嘅美酒之外，仲有機會學習葡萄酒嘅歷史、特色、儲存、運輸、食物配搭、服務等等不同範疇嘅技巧，同埋借飲酒嘅機會認識唔同嘅人，甚至可以手執餐廳酒品入貨嘅生殺大權。
九、食評家
減肥一定係個令食盡天下美食嘅食評家頭痛嘅問題！
平均月薪約 HKD30,500
免費食盡一流廚師為你精心炮製各式各樣嘅美食，得到最好嘅服務同招待，最重要係同其他人講起你嘅工作嘅時候，一定會得到對方七分羨慕三分妒忌嘅目光。
八、賽車維修技師
係香港似乎做個汽車維修員仲好過！
入行平均月薪約 HKD29,250 – 42,250
相信有唔少人都幻想過係風馳電掣嘅賽車裡面追逐少年時期嘅熱血夢想，但畢竟做賽車手需要天份同長時間嘅專業訓練，唔係話做就做。成為維修技師雖然都唔易，但門檻就相對貼地好多，不過香港舉辦大型賽事嘅機會唔多，似乎成為一個汽車維修員會仲實際。
七、荷里活特技人
係荷里活淨係開戲有自助餐食都已經贏哂！
平均月薪約 HKD45,500
係荷里活做荷里活級數嘅荷里活特技人當然可以收荷里活級數嘅人工，掉返轉係香港就冇咁值錢喇，仲可能搞到一身傷，就好似成龍話當年史提芬史匹堡問佢啲港產功夫片特技係點拍出嚟，佢就答：「好簡單，跳落去，碰，叫白車！」
六、玩具設計師
每次玩 Boardgame 都好佩服設計師嘅智慧。
平均月薪約 HKD46,150
設計到一樣好玩嘅玩具一啲都唔容易，對設計師嘅諗頭、心思、邏輯性、藝術感、空間感都係一個好大嘅挑戰，不過可以同大細路同事日日邊玩邊測試邊設計唔同玩具都係呢份工吸引嘅地方，你話一個唔覺意整咗款爆紅嘅玩具出嚟仲可能有得分紅添！
五、籤語餅 (Fortune Cookie) 寫手
呢個人工令唔少係香港日日寫嘢嘅 Ｍarketer 眼紅！
平均月薪約 HKD47,500
籤語餅係一種係美國非常流行嘅食物，多數作為中餐館裡面嘅餐後甜品，打開餅乾之後會係中間空心嘅位置見到一條籤文，係好多美國電視同電視劇都會見到，但係香港就未有見過。令人意外嘅係，雖然話籤文內容都係蘊含住生活智慧同哲理，但畢竟都係做下 Copy Writing，人工竟然可以高到離哂地。
四、電子遊戲設計師
雖然過癮，但係記得要好好保養對眼同手指關指。
平均月薪約 HKD54,200
同玩具設計師一樣，電子遊戲設計師返工當然可以攞正牌係返工時間玩，但好多人忽視咗做呢份工仲可以享受將自己生活經驗同理念融入遊戲，以及係遊戲埋藏彩蛋嘅樂趣。
三、法拉里駕駛導師
首先要考個棍波牌先……
平均月薪約 HKD58,400
返工可以揸名車週圍威之外，駕駛導師仲係少數可以惡過米飯班主嘅職業之一，無乜壓力之餘仲可以賺大錢，絕對係愛車之人嘅 Dream Job！
二、私人島嶼管理人
真正可以體驗下「椰林樹影，水清沙幼」……
平均月薪可達 HKD65,000
做得島嶼管理人當然唔簡單，除咗管理、物流安排、住宿服務、烹飪一腳踢之外，可能仲要識急救、救生呢啲技能，不過島上有陽光與海灘，可以日日探險同大自然玩遊戲，腦細唔係度就可以霸哂成個島等等，呢啲體驗都唔係一般工作可以畀到。
一、道德黑客 (Ethical Hacker)
除咗專業，高薪之外，你腦細仲唔敢得罪你……
平均月薪約 HKD66,600
道德黑客唔係傳統嘅職業，但其實存在已久，仲係一個非常專業嘅領域。一般黑客嘅目的係入侵或破壞，道德黑客就透過入侵測試嚟檢查同埋為企業提供保安改善建議。有行內人話情況有啲似玩解迷遊戲，成功過關就有相當大嘅滿足感！
本文章版權乃JOBMagnet所擁有，如欲轉載文章，請與我們聯絡。
