好想紮？　獲得升職機會的準備功夫

而家講升職其實話易唔易，話難唔難，因為都好睇腦細孤唔孤寒公司嘅結構、文化同需要，唔係單靠覺得自己有料就可以。

正如周星星一樣，想紮都要幫「奪命鉸剪腳」黃局長搵返支失槍，幹一翻豐功偉業出嚟先可以成事。當然，如果你屋企好有錢或者後台夠哂硬又另當別論。

咁究竟搏紮要準備啲咩？

全力以赴　做到最好

唔係求其掉大台口號出嚟呃版面，而係大台高層真係透過呢句嘢明確咁表達對一眾打工仔嘅工作期望，當然做唔做到又係兩件事。以下準則畀大家參考下──

好人好事：好嘅工作表現當然係重中之重嘅升職條件。若果腦細主動畀 Task 你就好明確啦，但如果行「無為而治」，咁你最好都為自己訂立工作目標，然後畀上頭 Approve，每過一段時間就 Email 下腦細，白紙黑仔咁報告一下工作進度。

埋堆：「一枝竹仔易折彎」、「團結就是力量」等等雖然係老生常談，但就一語中的。除非你玩 One Man Band ( 咁就唔需要諗升唔升啦！)，否則任你工作性質點獨立都好，始終都要同其他人交流，參與呢個群體遊戲。如果個個都係腦細背後插你一刀，任你做嘢做到曉飛都會大打折扣。

見首見尾：你唔係神龍，唔需要見首不見尾；你亦都唔係腦細，行蹤唔駛飄忽。返工準時、請假有交帶都係可以加分嘅表現。

主動參與：除咗 Project 之外，有啲公司會同員工安排「課外活動」，可能係個 Talk，可能係 Team Building，開心啲就可能去個 BBQ 咁。如果時間容許就不妨參加，除咗可以同同事有工作上以外嘅互動外，仲可以趁機接觸管理層，令佢地對你留低印象。

持續增值：千祈唔好錯過任何公司提供機會畀你嘅進修機會。若你覺得本身嘅技術追唔上時代嘅步伐，就要多加留意可以令自己增值嘅課程喇。

勇於要求

係你多番努力下你腦細一定會見到你嘅表現考慮升你職，除非唔會！係呢個情形底下，幫到你嘅就只有你自己，搵個啱嘅 Timing，攞埋可以證明自己工作表現嘅紀錄，捉腦細入房，同佢講你已經準備好進入事業上嘅下一個階段。

華麗轉身

唔好以為當你成功爭取升職成件事就宣告完成，雖然升職後舊同事嘅關係或多或少都會改變，但都最好用少少時間同佢地交代好講聲 Byebye，保持聯絡，畢竟同一間公司底下，將來可能都仲有好多合作機會。不過，呢啲嘢記得記得記得一定要係公司正式 Announce 咗先好做。