凍到變雪條　辦公室冷氣迷思

冷氣咁凍唔啱中國人？

香港除咗以工時長度奪下全球之冠，室內冷氣嘅低溫亦舉世聞名，甚至連遇強越強嘅內地人都敗係香港商場嘅寒流攻擊之下。

不過除咗遊客外，相信係辦公室返工嘅人都對室內冷氣溫度有好深嘅一番體會。

由上個世紀開始，大部份辦公室嘅溫度都維持係 20℃ 至 22℃ 之間 ( 當然有啲公司仲低啦 )，返工嘅你同我已經習以為常，但呢個所謂嘅「標準」究竟係點樣釐訂嘅呢？

其實呢個溫度好可能係嚟自 1960 年代係美國嘅一項研究中，因應一名年齡為 40 歲，體重介乎於 150 至 160 磅之間嘅美國男性嘅身陳代謝率而設嘅室內冷氣舒適工作溫度。

換句話說，只要你唔啱年齡，或者唔啱體重，甚至只要唔係男人，呢個所謂嘅舒適溫度都唔會令你舒適，反而會令你嘅工作效率下降！

室內溫度極端，工作能力下降

如果室內溫度太高，會令到人流汗好唔舒服，仲會加速身陳代謝，令人難以靜心工作就好多人都明，但原來溫度過低一樣會令你做嘢事倍功半，事因你嘅身體會用更多嘅能量去維持體溫，變相減少分配畀腦部嘅資源，降低你嘅思考能力。

準備「三寶」防凍最穩陣

所以當聽到有人話係辦公室越坐越凍，甚至手腳冰冷就一啲都唔出奇，因為除咗工作時血液循環減慢、唔夠訓、財多身子弱等等原因之外，可能部冷氣嘅溫度就根本就唔係為你而設！如果大家返工長期都覺凍，咁就奉勸大家帶足辦公室「三寶」：外套、頸巾 ( 披肩 )、暖水壺，有備無患。

不過有網民就話，最慘就係做嘢已經夠忙，仲要係公司俾嗰部唔夠力嘅冷氣焗都紅都面哂，寧願開勁冷氣凍死都好過呀！